老婆條屍唔見咗（下）
上集：https://bit.ly/3itXjEv
我哋嘅相處舒服咗，你係咪以為，我哋會從此幸福快樂咁生活落去？
唔係，我老婆仲有好多缺點，例如佢會嫌三嫌四，成日拎我同佢朋友嘅老公比較。
冇錯，我係比唔過佢朋友嘅老公，但我都有自尊心㗎，成日要我承認自己不如人，真係好大壓力。
壓力太大，就會爆煲。
某一次嘈交，我怒火中燒：「你唔好再拎我同其他人比，好乞人憎啊。」
然後，我一時火遮眼，殺咗佢。
我又再好慌張好後悔，我將老婆擺落車尾廂，想上山埋咗佢條屍。
出於一種詭異嘅期待，我揸車去咗上次嗰座山。
四野無人，我打開車尾廂，佢條屍唔見咗。
「Yes！我得咗！」我忍唔住高聲歡呼。
呢次我冇再搵屍體，我若無其事咁返到屋企，老婆果然喺度，完全唔記得我殺過佢。
而且，從此之後，老婆冇再拎我同其他人比較。
咦，我好似發現咗一個詭異嘅規律。
每次我因為老婆嘅某個缺點，激憤之下將佢殺死，老婆會復活，復活後仲會冇埋嗰個缺點。
換句話講，只要我殺多佢幾次，佢就會愈變愈好，變成一個完美嘅老婆。
大家可能會覺得我好變態，但我都係為咗夫妻關係著想，反正佢又唔係真係會死。
自此之後，我冇再克制自己。
嘈交嘈到火起，我就將老婆殺死，殺咗幾次，老婆已經改埋不修邊幅、唔鍾意做家務、成日想買名牌等等嘅缺點。
朋友都好羨慕我，有個咁好嘅老婆。
不過，夫妻間總係有矛盾嘅。
又一次嘈交，我下意識伸手去捏老婆條頸，其實嗰一剎那我有諗過，我仲需唔需要殺佢，畢竟佢好似冇咩需要改。
但轉念一想，人點會冇缺點，只係我一時間講唔出佢有咩缺點，我幫佢改進自己，始終係好事嘛。
但估唔到，我啱啱捏住佢條頸，我忽然被電擊，下意識鬆咗手。
然後老婆衝咗出門口，我見到佢手上拎住支防狼電棒。
老婆跑得好快，我仲著住條睡褲，都唔知追唔追好。
轉眼間老婆已經跑走咗，我都唔知佢搞乜。
過咗一陣，我俾人拉咗。
原來老婆跑去報案，話我家庭暴力。
佢條頸上仲有我嘅手指印，身上都有我以往唔小心打到佢嘅傷痕，所以好容易就落咗案。
我被起訴，老婆都提出離婚。
我百思不得其解，點解件事突然間會變成咁？
我忍唔住問：「我哋一直都好地地，做咩你嗰日突然袋住支防狼棒，又突然去報案？」
「好地地？你捏死咗我咁多次，我袋支防狼棒，好出奇咩？」老婆冷笑。
我口都窒埋，努力掩飾：「乜嘢捏死你，你依加咪生勾勾……」
「唔好扮啦，我咩都知道。」
老婆講出真相，原來，佢未識我前，曾經去過苗彊一帶旅行，意外救咗個婆婆。
婆婆送咗八隻替身娃娃俾佢，話可以抵擋外來嘅殺劫，即係有人殺佢，可以用替身娃娃代替，但自己有病有意外，替身娃娃就幫唔到。
老婆苦笑：「我嗰陣以為，替身娃娃就算係真，對我都冇乜用。用機率嚟計，一個城市人點會俾人謀殺，仲要謀殺幾次？」
然後，老婆第一次被我殺死，碎咗一隻替身娃娃。
「嗰次我真係好震驚，估唔到你會殺我。但我見你返到屋企，喊住叫『老婆』，我就諗，你都係愛我嘅，意外嚟啫。」
老婆嘆氣：「我唔想大家面左左，我就扮到咩事都發生過。」
我問；「所以你改埋你嘅缺點，唔再囉唆？」
「嗯，既然你咁介意呢樣嘢，咁我就改咗佢，我以為你會對我滿意。我估唔到，呢件事會一次次咁重覆。」老婆搖搖頭。
我一次又一次咁殺佢，佢一次又一次咁改自己嘅缺點。
我附和：「你真係改得好好，我好滿意㗎。」
「你呢次想殺我，係因為我有咩缺點？」老婆問。
我答唔出。
老婆繼續講：「人嘅忍耐有極限，你上次殺我後，我已經對你好失望。我買咗支防狼電棒，我同自己講，如果你再想殺我，我就改埋我最後一個缺點。」
「你邊度仲有缺點啫，你好完美啦。」我講嘅係真心話。
「我最後一個缺點，亦係最大嘅缺點，就係『我愛你』，所以你打我殺我，我都畀機會你。」
老婆長嘆一口氣：「我改埋啦。」
如果對方不斷挑剔你，話你有好多缺點，你點樣改佢都唔滿意。
其實，佢永遠都唔會滿意。
而你最應該改嘅缺點，係愛佢。
－完－
長生不死之後：https://goo.gl/EMHtc4
兩個只能活一個：http://bit.do/feKot
#短故 #短篇 #小說 #陳美濤 #廣東話 #粵語 #tomatochan #老婆條屍唔見咗
Search